Wednesday, February 8, 2017

ஹதீஸ் தொகுப்புகள்..!!



ஹதீஸ் தொகுப்புகள் முறையாக ஆரம்பிக்கப்பட்டது இரண்டாம் உமர் எனப்படும் ஹல்ரத் உமர் இப்னு அப்துல் அஸீஸ் (ரஹ்) அவர்களின் காலகட்டத்தில். இவரது காலம் ஹிஜ்ரீ 61-101 வரை. முதல் தொகுப்பை தொகுத்தவர், ரபீஃ இப்னு ஸபீஹா. இரண்டாமவர், சயித் என்பவர். ஹிஜ்ரீ 101 எனும்போது ஹிஜ்ரீ இரண்டாம் நூற்றாண்டில் ஆரம்பம்.

இந்த கால கட்டத்தில் மதீனாவில் இமாம் மாலிக் (ரஹ்), மக்காவில் இமாம் இப்னு ஜுரைஜ் (ரஹ்), சிரியாவில் இமாம் அவ்சாஈ (ரஹ்), கூஃபாவில் இமாம் சுஃப்யானுஸ் ஸவ்ரீ (ரஹ்), பஸராவில் இமாம் இப்னு தீனார் (ரஹ்), யமனில் இமாம் முஹம்மத் (ரஹ்), குறாஸானில் இமாம் இப்னு முபாரக் (ரஹ்) ஆகியோர் ஹதீஸ்களை தொகுத்தனர். இவைகளில் ஹதீசும் உண்டு, அதோடு, சஹாபாக்களின் சொற்கள், தீர்ப்புகள், தாபியீன்களின் சொற்கள் எல்லாவற்றையும் சேர்த்துதான் தொகுப்புகள் உருவாக்கப்பட்டன.

தாபியீன்களின் சொற்கள், நடவடிக்கைகளுக்கு அரபியில் ‘அசர்’ என்று பெயர். சரியாகச்சொன்னால் சுத்தமான தொகுப்புகள் என்று எதுவும் கிடையாது, இந்த கால கட்டத்திற்குப்பிறகு ‘முஸ்னத்’கள் உருவாக்கம். ஹதீஸ்களை மட்டும் தொகுக்கும் பணி ஆரம்பமானது. அதாவது, சஹாபாக்களின் அறிவிப்பு முறை வைத்து தொகுப்புகள் உருவாக்கப்பட்டன. உதாரணமாக, முதலில் அபூபக்ர் (ரலி) அவர்கள் அறிவித்தவை எல்லாம், அடுத்து உமர் (ரலி, அவர்கள் அறிவித்தவை எல்லாம், பிறகு, உஸ்மான் (ரலி அவர்கள் அறிவித்தவை எல்லாம், அதற்குப்பிறகு, அலி (ரலி) அவர்கள் அறிவித்தவை எல்லாம், இவ்வாறு சஹாபாக்களை முக்கியத்துவப்படுத்தியும், வரிசைப்படுத்தியும் உருவாக்கப்பட்ட தொகுப்பு களுக்கு முஸ்னத்கள் என்று பெயர். இவ்வகை நூல்களில் ஹதீஸ்கள், தலைப்புகளின் அடிப்படையிலும் விஷயங்களின் அடிப்படையிலும் இருக்காது.இத்தகைய காலகட்டத்தில்தான் நாற்பெரும் இமாம்களின் வருகை

இமாம் அபூ ஹனீபா (ரஹ்) 
ஹி, 80 – 150 , கி.பி 699 – 767 . 
வயது, 70 (அ) 71.
இமாம் மாலிக் (ரஹ்) 
ஹி, 95 – 179 கி.பி. 714 – 798 வயது, 84
இமாம் ஷாஃபிஈ (ரஹ்) 
ஹி, 150 – 240 கி.பி. 767 – 859 வயது, 90 (அ) 92
இமாம் அஹ்மத் இப்னு ஹன்பல் (ரஹ்) ஹி,.164 – 241 கி.பி, 780 – 855 வயது 75 (அ) 77

அதாவது, இவர்களுடைய ஆய்வுக்கு கிடைத்த ஹதீஸ்கள் எல்லாம் முறையான ஹதீஸ் தொகுப்புகள் உருவாகுவதற்கு முன்னர்தான். இதற்கு அடுத்த காலகட்டத்தில்தான் இன்று நம்மிடையே உள்ள அதிகாரபூர்வமான ஹதீஸ் தொகுப்புகளான புகாரீ, முஸ்லிம், அபூதாவூத், திர்மிதீ, நஸஈ, இப்னு மாஜா ஆகிய ஆறு தொகுப்புகளின் உருவாக்கம் தொடங்கி முடிவடைகிறது. இவற்றில் முதல் இரண்டுக்கு மட்டுமே ‘ஸஹீஹ்’ எனப்படும். அதாவது, ஆதாரபூர்வமான ஹதீஸ் தொகுப்பு என்று பொருள். இரண்டுக்கும் சேர்த்து ‘ஸஹீஹைன்’ எனப்படும். இவை இரண்டு தவிர மற்ற நான்கு தொகுப்புகளுக்கு ஸுனன் எனப்படும். ஸுனன் என்றால் சுன்னத் என்பதன் பன்மை. அதாவது,ஸுனன் அபூ தாவூத்,ஸுனன் திர்மிதீ,ஸுனன் நஸஈ,ஸுனன் இப்னு மாஜா. இந்த நான்கின் தகுதி என்னவென்றால், இவைகளில் சந்தேகத்திற்கு அப்பாற்பட்ட ஹதீஸ்களில் இரண்டாம் நிலையில் உள்ளவையும் உண்டு. எனினும் இவை ஆறுக்கும் சேர்த்து ‘ஸிஹாஹுஸ் ஸித்தா’ என்றே பெயர் வழங்கப்படுகிறது. ஆனாலும் முதல் இரண்டின் இடத்தை இந்த நான்கு நூல்களால் பெற முடியவில்லை.

இமாம் புகாரி (ரஹ்) அவர்களின் காலம் ஹிஜ்ரீ 194 – 256 இமாம் முஸ்லிம் (ரஹ்) அவர்களின் காலம் ஹிஜ்ரீ 202 – 261 இதனால்தான் நான்கு இமாம்களும் இவ்வாறு வாக்கு மூலம் தந்துள்ளார்கள் : ”எங்களுக்கு கிடைத்துள்ள ஹதீஸ்களின் அடிப்படையில், எங்களால் முடிந்த அளவுக்கு ஆய்வுகள் செய்துள்ளோம்; எங்கள் கருத்துக்கள் ஆதரப்பூர்வமான ஹதீசுக்கு மாற்றமாக இருந்தால் எங்கள் கருத்தை குப்பையில் தூக்கி எறிந்து விட்டு ஹதீஸை பின்பற்றுங்கள்.” இமாம் ஷாஃபிஈ அவர்கள், மாலிக் இமாமின் ‘முஅத்தா’ எனும் ஹதீஸ் தொகுப்பு பற்றி இவ்வாறு ஒரு அறிக்கை தருகின்றார்: ”வானத்தின் கீழ் இருக்கும் நூல்களிலேயே மாலிக் இமாமின் ‘முஅத்தா’ போன்றதொரு நூலை நான் கண்டதே இல்லை.”

ஆனால்,மாலிக் இமாமின் முஅத்தா எனும் நூல் ‘ஸிஹாஹுச்சித்தா’ எனும் ஆதார பூர்வமான ஆறு கிரந்தங்களில் இடம் பெறவில்லை. இதிலிருந்து தெரிய வருவதென்னவென்றால் இமாம் ஷாஃபிஈ உட்பட நான்கு இமாம்களுக்கும் பிறகுதான் முறையான ஹதீஸ் தொகுப்புகள் உருவாகி இருக்கின்றன எனும்போது அவர்கள் நால்வரும் ஆதாரபூர்வமான ஹதீஸ்களின் அடிப்படையில்தான் ஆய்வு செய்தார்கள் என்று கூற முடியாது என்பதுதான்.

No comments:

Post a Comment